彰化的現代詩

【完聘】

玫瑰開雙蕊　窗前來報喜
厝邊長女掛手只　約束年底結連理

阿公阿嬤歡喜笑滿面
祝福親相鴛鴦成對　感情糖甘蜜甜
祝福偌鳳凰相隨　一世人富貴順安

寫2005-10-15厝邊長女今仔日夆摜定

註解..掛手只→戴戒指

【心】

心是昧破的魚網
前塵往事是網內的小魚
置魚網內滾攪挑撥
那管歲月如箭
抹眛消過去酸甘苦澀的滋味

心是偎靠的港口
親情是行置海上的帆船
認定方向出帆
毋驚風雨大海湧
總是要平安倒返來靠岸

心是門口埕的大樹
青春是樹頂青青的樹葉
年華若去偌落葉
秋風年年吹落地
春天新蘡是下一代生命的延續

【冬至寒夜】

冬至又寒流　天冷心亦冷
火爐溫燒酒　呤酒想早前
全家歡喜吃冬至圓

如今冬至圓　猶原圓擱甜
父母已經無置身軀邊
年年春去又冬至　歲月偌水流
父母只置夢中留
三分茫　眼迷濛
目屎摻酒吞落喉！

【早春】

日頭淺淺　淺淺照置芋田
白雲輕輕　輕輕飛置天頂
芋葉親像一支一支的雨傘
芋傘借南風　甩掉傘頂的露水
芋田邊的野花　笑到搖搖擺擺
春天的早起
有寒冬未走的空氣！

【立春】

春雷響亮
叫醒睏冬的靈魂
立誓拍拼是春的志氣

春雨綿綿
濕潤礁躁的心情
清涼貼心是春的溫柔

春花多彩
裝飾寒冬的蒼白
美麗漂亮是春的希望

春鳥展翅
鼓勵消沉的意志
飛懸看遠是春的方向

【春天】

春天的茫霧
用溫柔的紗巾　包著路燈
冬天的孤單佮寂寞
攏置微微的燈光　流失

提早來的春天
有點桃花的胭脂
抹杜鵑的水粉

美麗是春天的本事！

【思念】

春天微微的風　有叫阮的聲音
春天白濛濛的天　有慈愛的笑容
春天綿綿的雨　有阮思念的目屎

昨暝歡喜的眠夢
為何又擱澹了阮兮目墘？

【黃昏的海邊】

一個儂置海邊散步　海風吹著長頭毛
只有影跡　兌阮的腳步
幼綿綿的海沙印著阮的腳跡　親像阮纏綿的寂寞

海湧開的白色花蕊　這尼燦爛
卻　佮阮同款　無儂疼惜
只有日頭置彼爿的地平線　掠阮金金看！

【旅程】

行到這
踏過家己層層疊疊的影跡
回頭　不見來時的路途
滴落來的目屎
是路中央的反光石
遠遠卻是一片黑

母親的面容　偌天星
置黑暗的所在　閃爍

【落大雨的透早】

天才光　茉莉就暗暗傷心
珠淚親像斷線的珍珠
好花　未堪雨水來打散
置湳土中沉浮　失去美麗的光彩

落大雨的透早　阮攬著綿被　
憨憨偎置眠床頭　神神看著窗外　
心情親像大雨　潑地空虛的心房

日頭偌出來　阮要如何整理
落到滿土跤的小花蕊？

【夢中的後花園】

阮又來到夢中的後花園
花園內
毋是富貴的牡丹
亦毋是艷麗的玫瑰
是阿母種的菜瓜
開滿黃色的花蕊
一蕊一蕊
向阮微微阿笑！

【鳳凰花】

溽天的腳步遠遠行來
親像往年
恬恬來到阮身邊
滿天的花蕊是鳳凰
美麗親像阮的青春

記智中的鳳凰樹
跂置阮兜厝角
陪阮度過天真囝仔時
毋知世情現實

如今秋風一再吹　鳳凰落滿地
未記智當時花開歡喜　只袸傷情
阮的青春　躡著腳步
兌鳳凰花開花謝慢慢消失　一去無回！

【孤單】

離開鬧熱的儂聲
行置無月的街路
迷迷濛濛的路燈
儂影置厝壁伴阮行

越入小巷
只袸腳步聲　佮寂寞的心晟
置暗暗的小巷

【傷】

孤單
迎接每一個黃昏

佮寂寞
共度每一個晚暝
　
十六歲的青春　蒼白
如今回首
同款無法度回頭！

【成就】

如果人生就是愛經過烈火所煉
偌按尼　終其尾
阮是會變作藝術品互儂訶咾
還是
置烈火中碎去　
存一堆的火烰
佮一聲唉未出嘴的痛疼

【離】

腳步聲　一步比一步較遠
是你行置
千萬片落葉的小路　離開

只是你攏嘸知
千萬片的落葉
有阮
千萬般嘸甘的心情
只是講眛出喙

【好天】

置還未罩黑雲的進前　
阮向日頭講起：
最近　種種的不如意。

日頭恬恬無講話　密入去黑雲內底面，
用清涼的雨水　沖洗阮渥雜的情緒；
閣用伊炎熱的光芒　曝礁阮澹濕的心房，
互阮一個全新的心情　行向未來！

【未醒】

天頂的月娘　猶　
留戀昨暝甜蜜的戀夢
毋甘落山

昨暝的愛人　
披著花言巧語的外衫　
頭也無越　
消失置路燈最後的光線

【古井】

圓圓兮古井　舊思情
想早前　吃食洗澢全靠伊
查某儂一邊洗衫
一邊話長短
講到歡喜　笑聲傳井底
講著傷心　井邊目屎撥

圓圓兮古井照古月
古井藏舊情
古月猶原置天頂

【節氣】

親相澹濕的棉被
置冷冷的眠床
蓋著一軀失意的靈魂
心情冬至！

棉被披置竹篙頂
互暖暖的日頭
曝礁、打鬆親像藍天
心情立春！

【甕】

肚大口細
曾經
阿嬤醃過醬菜
阿母浸過鹹肉

圓圓膨膨的腹肚
知悉
阿嬤刻苦耐勞
阿母勤勤儉儉
卻　未當留住
阿嬤的年歲
保存　阿母的青春

【玻璃珠的夢】

囝仔的夢　鎖置玻璃珠內底
阮開始用青春來編織戀愛夢
初戀的詩句　
是純真的目屎
甜甜的笑容
是一場美麗的眠夢

成熟是眼中消失的春夏秋冬

人生偌一台火車
儂客起起落落　是短暫的緣分
是朋友　是仇人　攏是一時的情緒
越頭看　斟酌想
緣盡緣斷　半點不由人
又　何必認真來計較

人情冷暖　敢有叨一項是永遠？

【迎春】

窗外蝴蝶
紅的　白的　粉紅的
擱有神秘的茄阿色
親像仙女　置窗外翩翩飛舞
原來徬見的春天
又擱來到阮窗前

行出門口埕
要佮春行禮
才知毋是蝴蝶置咧飛
毋是仙女咧跳舞
是阮吊置簷前的蝴蝶蘭
歡喜春天倒返來
開到親像蝴蝶四界飛

註解．．
置窗外→在窗外
徬見→不見　台語音ㄆㄤˋ見
要佮→要和
置咧飛→在飛
簷前→屋簷

【寫置中秋暝】

秋天　每年攏參像（1）
菅芒開到滿滿是　使阮心碎
心碎的毋是（2）菅芒的白花蕊
是阮雙親的白頭鬃

應晚（3）　參（4）以前攏同款
月光躡腳（5）入小巷　互阮心醉
心醉的　毋是窗外的月娘
是想起　偎置（6）雙親的身旁

藉著月光　三分的醉意
寫一封批　互阮心愛的爸母
只是未落筆　喉管先滇（7）
思念化作目屎澹（8）目墘

註解..
（1）都很像
（2）不是
（3）今晚
（4）和
（5）踩著很輕的步伐，不發出一點聲音
（6）在
（7）滿
（8）濕

2004-09-28-中秋暝

【打死結】

朋友
阮知汝來自何處
汝重重的腔口
是阮思念的鄉音

啊！
原來　咱是同鄉　曾經
吃過肉圓　爬過八卦山　拜大佛
只是當初相遇不相識
如今相逢置他鄉

鄉愁啊！
置阮兮心肝底
打死結！

【夜思】

半暝　雄雄驚醒
心內的空虛
親像布袋破一大孔
寶貝落到無半項

只有窗外的月娘
知阮返未去
囝仔時代的　故鄉！

【作戲仔】

徛置戲棚頂
用阮的青春
扮演別儂兮故事
悲歡離合
春夏秋冬

誰知阮
一年比一年
較厚的澎粉　掩蓋
漸漸退色兮光彩

【人生的過程】

目標是美麗兮遠景
你敢是攏頭儽儽　一直衝？
無看　沿路風景如畫
無聽　鳥隻一路唱歌

理想雖然迷儂　但
身邊的景色才是真實
阮一路欣賞
用心收藏！

1. 歡迎自己創作的作品投稿，作者不限定彰化人

2. 本站接受一稿兩投 ( 作品版權屬作者擁有 )，但請加註先前刊登的網站或報社雜誌